रायपुर। कुर्मी समाज के चुनाव रद्द होए के मामले म चोवाराम ह पुलिस के आगू आवेदन लगाए हे कि एला अउ उंखर परिवार वाले मन ल सुरक्षा प्रदान करे जाए, काबर कि मोर खिलाफ साजिश रचे जात हे। कुर्मी समाज के चुनाव के दउरान चोवाराम घलो प्रत्याशी रहिन हे, जे ह आरोप लगाइस रिहिस कि कांग्रेस के प्रदेशाध्यक्ष भूपेश बघेल ह चुनाव ल रद्द करा दिस। चुनाव के ठीक बाद म एक वीडियो घलो सोशल मीडिया म वायरल होय हे, जेमा समाज के कुछु लोगन मन भूपेश के खिलाफ नारेबाजी करत हे। वीडियो म मुरदाबाद अउ समाज ले निकाले के घलो बात विडियो म हे।
चोवाराम वर्मा ह पुलिस ल देगे पत्र म कहे हे कि चुनाव प्रभारी मदन कश्यन ह मोर अउ मोर परिवार उपर झूठा आरोप लगावत हे। येखर निष्पक्ष जांच होय चाहि। उमन आवेदन म लिखे हे कि चुनाव के दिन भूपेश बघेल ह पानी के कमी बतात हुए चुनाव ल रद्द करवा दिस। मोर चुनाव के दउरान कोनो भी स्वजातीय ले कोनो विवाद नइ होय हे। उमन कहिन कि लोगन मन मोर समर्थन म रहिन हे, जेला कतको झन पचा नइ पावत रिहिन हे , एखर बर चुनाव ल स्थागित करे गेहे। जेखर गवाह समाज हे। उमन आशंका जाहिर करे कि मोर उपर कोनो भी प्रकार ले आरोप भविष्य म लगाए जा सकत हे।
