रायपुर। रेलवे ह दुरघटना मन ल रोके बर ड्रोन कैमरा मन के इस्तेमाल करही। एखर ले रेल पटरी मन के सही तरीका निगरानी हो सकही। अउ दुरघटना मन ल रोके जा सकत हे। संग -संग कभु भी कोनो दुरघटना के स्थिति म तुरंते सुविधा मन मुहैया कराए के काम घलो करे जाही।
रेलवे ह सामान्य मैदान इलाका मन ले लेके नक्सली क्षेत्र मन तक रेल के पटरी के सुरक्षा बर रेलवे ड्रोन कैमरा के मदद लेय जात हे। वेस्ट सेन्ट्रल रेलवे म एखर सफल परीक्षण के बाद देश के सबो जोन म एखर बर प्रयास शुरू कर दे गेहे। छत्तीसगढ़ म घलोक रायपुर, बिलासपुर, दुर्ग जइसे मैदानी इलाका मन के अलावा नक्सली इलाक मन म भी रेलवे के पटरी बिछे हवय। नक्सली इलाका मन म रेल पटरी ल कई बार नक्सली नुकसान पहुंचाए हे। अइसे म ड्रोन कैमरा के नजर ले एमन पर नजर रखे जाही।
रेलवे के सीनियर डीसीएम तन्मय मुखोपाध्याय के कहिना हे कि रेल पटरी मन के सुरक्षा बर ड्रोन कैमरा जिहां मददगार साबित होवइया हे उहें ये ड्रोन कैमरा के मदद ले कभु भी कोनों भी दुरघटना हो जाए के स्थिति म तुरंते के तुरते उहां सुविधा मन अउ राहत पहुंचाए जा सकत हे।
