पुरखौती मुक्तांगन म दो दिवसीय पंडवानी उत्सव 22 मार्च ले

रायपुर। राज्य शासन के संस्कृति विभाग ह नया रायपुर स्थित पुरखौती मुक्तांगन म दो दिवसीय पंडवानी उत्सव के आयोजन करे जात हे। ये उत्सव पुरखौती मुक्तांगन के मंच म 22 मार्च के शाम 6 बजे ले शुरू होही। दो दिवसीय पंडवानी उत्सव म राज्य के प्रसिद्ध लोक पंडवानी गायक मन ह पंडवानी के वेदमति अउ कपालिक शैली म प्रस्तुति देही। संस्कृति विभाग के अधिकारी मन बताइस कि 22 मार्च के भिलाई के श्रीमती ऋतु वर्मा, दुर्ग के श्रीमती शांति बाई चेलक, कांकेर के मंजू रामटेके अउ लवन के कन्हैयालाल बंदे पंडवानी गायन करही। दूसरइया दिन 23 मार्च के पाहंदा चेतन देवांगन अउ दुष्यंत द्विवेदी, रनचिरई के श्रीमती मीना साहू, कुथरेल के श्रीमती इंदिरा बाई जांगड़े अउ भिलाई के श्रीमती उषा बारले पंडवानी गायन करही। ये पंडवानी उत्सव म आम लोगन मन ल प्रवेश निःशुल्क दे गेहे।