रायपुर। छत्तीसगढ़ म ये साल के आखिर म विधानसभा चुनाव होवइया हे चुनाव के पहिली ले राजनीतिक दल मन ह अपन दांव पेंच के खेल घलो शुरू कर दे हे।, अउ नेता मन कोनो भी मुद्दा मन ल खाली जाए अइसे नइ चाहय। छत्तीसगढ़ म भाजपा तीन बार ले सत्ता के सुख भोगत हे। अब भाजपा चउथा बार सत्ता पाए बर अपन ताकत लगावत हे। ये बार विधानसभा चुनाव के चुनावी शंखनाद मुख्यमंत्री डॉक्टर रमन सिंह मई के तीसरा सप्ताह यानी 15 मई ले विकास यात्रा के आगाज कर सकत हे। संभावना हे कि ये यात्रा दू चरण म होही। पहिली चरण मई ले शुरु होही। उहे दूसरइया चरण अगस्त ले सितंबर तक चले के सम्भावना हे। विकास यात्रा के शुरूआत बस्तर के दंतेवाड़ा ले करे जा सकत हे।
प्रदेश म छह महीना के बाद विधानसभा चुनाव होना हे। अइसे म सब्बो राजनीतिक दल मन ह अपन तैयारी तेज कर दे हे। इही कड़ी म अब भाजपा के स्टार प्रचारक अउ मुख्यमंत्री डा. रमन सिंह प्रदेश म चौथी बार भाजपा के सरकार बनाय बर विकास यात्रा के शुरुआत करही। ये यात्रा के जरिए भाजपा ल वोट देय के अपील करे जाही। बीजेपी कार्यकर्ता अउ पदाधिकारी मन ये यात्रा म पीछु बरस म होय विकास काम मन ल जनता के बीच लेके जाही। आप मन ल बता दन कि मुख्यमंत्री डा. रमन सिंह एखर पहिली 2008 अउ 2013 म विकास यात्रा निकाल चुके हे। 2013 म उँखर यात्रा दंतेवाड़ा ले शुरु होके अंबिकापुर तक चले रिहिस हे। सूत्र मन के कहिना हे कि ये बार घलो विकास यात्रा के शुरुआत दंतेवाड़ा के दंतेश्वरी मंदिर ले पूजा अर्चना के बाद शुरु होही।
