वनांचल कुई-कुकदूर म संसदीय सचिव के होइस भव्य स्वागत अउ नागरिक अभिनंदन

कवर्धा। वनांचल कुई-कुकदूर म महाविद्यालय के सौगात मिले के बाद पाछू शनिवार के दिन संसदीय सचिव मोतीराम चन्द्रवंशी के पहिली पईत कुकदूर आगमन होइस। इहां कुई-कुकदूर कोति के जम्‍मों नागरिक मन ह संसदीय सचिव के नागरिक अभिनंदन करिन। सबले पहिली युवा मोर्चा कोति ले संसदीय सचिव मोतीराम चंद्रवंशी के फटाका फोर के स्वागत करे गीस एकर पाछू कार्यक्रम स्थल तक डीजे के संग बाईक रैली निकाले गीस। हाईस्कुल के तीर सैकड़ो स्कुली छात्र-छात्रा मन ह फूलमाला अउ अभिनंदन पत्र के संग क्षेत्रीय विधायक अउ संसदीय सचिव मोतीराम चन्द्रवंशी के स्वागत करिन। अउ कालेज के सौगात देहे बर मुख्यमंत्री डॉ. रमन सिंह अउ सांसद अभिषेक सिंह ल धन्यवाद ज्ञापित करिन।
संसदीय सचिव मोतीराम चंद्रवंशी ह सबो के अभिवादन स्वीकार करत कहिन कि शिक्षा वो अस्त्र आए जेकर से सबो समस्या मन के समाधान करे जा सकत हे। ये काम ह बजट के व्यवस्था ले नइ होवय, ये तब होथे जब सपना होवय अउ काम करे के जज्बा होवय। विधायक बने के बाद ए वनांचल क्षेत्र म महाविद्यालय खोले के सपना जउन मै ह देखे रहेंव वो आज साकार होइस हे। 12 वीं पास कई युवक अउ बेटी मन दूरिहा म कालेज होए के सेती उच्च शिक्षा ले वंचित हो जात रहिन हे । कई लइका मन के मॉ-बाप दूरिहा भेजे म सक्षम घलव नइ हवय। अइसे लइका मन अब उच्च शिक्षा पाए से वंचित नइ होहीं। अब उमन ल उच्च शिक्षा बर दुरिहा जाए के जरूरत नइ हे। आप सबो मन मोला अतक मया अउ सम्मान देहे हव एकर बर मै आप सबके आभारी हंव, धन्यवाद देवत हंव। नागरिक अभिनंदन म मुख्य रूप से मंडल अध्यक्ष रिद्धराम श्याम, बाबुलाल चन्द्राकर, सुधीर पाण्डेय, रतिराम भट्ट, होटल सिंह, रविन्दर सिंह, दिपक सलुजा, मनोज कोठारी, सोनू ठाकुर, स्वतंत्र तिवारी अउ बड़ संख्या म कार्यकर्ता अउ क्षेत्रवासी उपस्थित रहिन।