रायपुर। छत्तीसगढ़ म साल के आखिर म होवइया विधानसभा चुनाव बर जातिगत समीकरण राजनीतिक दल मन बनवत हे। दरअसल, दुर्ग ले कांग्रेस सांसद ताम्रध्वज साहू ल ओबीसी वर्ग के राष्ट्रीय अध्यक्ष बनाए गेहे। जेलाएखर संग जोड़के देखे जात हे। कांग्रेस के राष्ट्रीय अध्यक्ष राहुल गांधी ह छत्तीसगढ़ म विधानसभा चुनाव ल टारगेट करत हुए इहां के बहुसंख्यक ओबीसी वर्ग ल साध के प्रयास करे हे। एखर सेती दुर्ग सांसद ताम्रध्वज साहू ल कांग्रेस ओबीसी वर्ग के राष्ट्रीय अध्यक्ष बनाए गेहे। एती पीसीसी अध्यक्ष भूपेश बघेल घलो खुले तौर म मानत हे कि ताम्रध्वज साहू के ओबीसी वर्ग के राष्ट्रीय अध्यक्ष बने ले आगामी चुनाव म फायदा मिल ही।
भूपेश बघेल के कहिना हे कि ये निर्णय के बाद ले पूरा छत्तीसगढ़ के पिछड़े वर्ग के लोगन मन म खुशी के लहर हे। एखर लाभ उंखर पार्टी ल को आगू चलके जरूर मिलही। दूसर ओर सत्ताधारी बीजेपी जातिगत समीकरण ल लेकर इत्तेफाक नइ रखत हे। सरकार के मंत्री राजेश मूणत के कहिना हे कि जाति वर्ग विशेष के राजनीति करे के दिन खत्म हो गे हे। जनता विकास चाहत हे। बीजेपी ह अपने कार्यकाल म विकास ही विकास करे हे। एखर सेती चौथी बार घलो छत्तीसगढ़ म बीजेपी के सरकार बनही। उंहचे राजनीतिक विश्लेषक मन ह ये मानत हे कि छत्तीसगढ़ म जाति धर्म के राजनीति के तासीर नइ हे। अइसे म जातिगत राजनीति करने वाला मन ल नुकसान हो सकत हे।
