माड़ागांव म पहुंचिस मुख्यमंत्री ह, कहिन कि अधिकारीमन के इमेज सही नइए

वरिष्ठ कृषि विस्तार अधिकारी ललित यादव ल करिस निलंबित
गरियाबंद। लोकसुराज अभियान के तृतीय चरण म शनिवार के सीएम रमन सिंह गरियाबंद जिला के देवभोग विकासखंड के ग्राम माड़ागांव म पहुंचिस। इहां आयोजित समाधान शिविर म सुपेबेड़ा के किडनी के बीमारी ले पीड़ित 96 विधवा परिवार मन ल 50-50 हजार रुपिया के सहायता राशि दे के घोषणा करिस। ये दउरान किसान मन ल बीज मिनी किट नइ बांटे के शिकायत म सीएम ह वरिष्ठ कृषि विस्तार अधिकारी ललित यादव ल निलंबित करे के निर्देश दिस। माड़ागांव म कैम्प लगा के एक सप्ताह के भीतर नामांतरण, बंटवारा अउ सीमांकन के प्रकरण मन के निराकरण करे के निर्देश दिस। शिविर म सब्बों विभाग के अधिकारी मन ल मंच म बुलाके उँखर विभाग के योजना मन के प्रगति, शौचालय के पूर्णता अउ मनरेगा म लंबित भुगतान के जानकारी लीस। मुख्यमंत्री ह कहिन कि अधिकारी मन के इमेज सही नइ हे। उमन ह रवैया सुधारे के नसीहत दीस। उँखर संग मुख्य सचिव अजय सिंह समेत कई अधिकारी मौजूद रहिस हे।