रजिस्ट्री दफ्तर म सचिव अउ आईजी ह करिन अचानक निरीक्षन 

रायपुर। रायपुर के रजिस्ट्री दफ्तर म शनिवार के सचिव सुबोध सिंह अउ आईजी धर्मेश साहू ह औचक निरीक्षन करिन। ए दउरान कई खामियां मिलिस जेला रजिस्ट्रार ले दूर करे के निरदेस देय गिस। रजिस्ट्री कराइया मन  ह सचिव ले कहिन के इहां दलाल मन के जमावड़ा लगे रहिथे, ए वजह ले आम लोगन के  रजिस्ट्री नइ होवय।

बता दन के, रजिस्ट्री कराइया मन के सिकायत मिलक रहिथे के रजिस्ट्री दफ्तर म जनता ल परेसानी होवत हे अउ दलाल मन के चलत आम लोगन के रजिस्ट्री नइ होवय। सिकायत म आज सुबोध सिंह मउका म पहुंचिन अउ रजिस्ट्री दफ्तर के निरीक्षन करिन।  उमन देखिन के रजिस्ट्री दफ्तर म काफी गंदगी फइले हे। सब-रजिस्ट्रार घलो बेरा म नइ पहुंचे हवय। एला लेके सचिव ह पंजीयक  ले कहिन के   बेवस्था म विसेस  धियान दे जाए। उहें रजिस्ट्री कराइया मन के संख्या घलोक  जादा हवय, जबके कर्मचारी काफी धीमी गति ले काम कर रहत हे। इहां आए दिन सर्वर के परेसानी के घलोक सिकायत मिलिस। एती  जिला पंजीयक बीएस नायक ह कहिन के आज सचिव अउ आईजी के निरीक्षन रहिस हे, जेमा इहां के कमियां मन ल गिना के सुधार करे के बात कहे हे।