रायपुर. प्रदेश म शिक्षा के गुणवत्ता म सुधार बर शिक्षा विभाग ह अब्बड कन महत्वपूर्ण फईसला ले हे। ऐमा प्रदेश के 14 जिला म 16 नवा एकलव्य विद्यालय खोले जाए के फईसला घलो शामिल हे। छात्रावास अऊ आश्रम मन म एडमिशन के बेरा म लईका मन के सेहत के जांच कर ले जाही अऊ सुबह के बेरा म छात्रावास म नाश्ता देना घलो अनिवार्य कर दे हे।
राजनांदगांव के मानपुर, बलरामपुर जिले के वाड्रफनगर अऊ कुसमी, कोरबा के पाली, बिलासपुर के पेंड्रा, बस्तर के तोंकापाल, कोरिया के सोनहत, सूरजपुर के प्रतापपुर, सुकमा के कोंटा, कांकेर, दंतेवाड़ा, जशपुर, बीजापुर, अऊ सरगुजा के दो ब्लाक ल चिन्हांकित करे गे हे। जिहां एकलव्य विद्यालय खोले जाही।
स्कूलों म ’स्वस्थ्य तन – स्वस्थ्य मन’ योजना ले हर महीना दू बार लईका मन के स्वास्थ्य के परीक्षण करे जाही। अधिकारी मन ल निर्देशित करे जाही कि छात्रावास मन के जांच नियमित रूप ले करे। उहें छात्रवृत्ति वितरण बेवस्था के भौतिक सत्यापन करे बर घलो केहे गे हे। संग-संग निजी संस्था मन के घलो शत-प्रतिशत सत्यापन करे जाही। नवा शिक्षा बछर म छात्रावास अऊ आश्रम मन के स्थिति ल व्यक्तिगत रूप से अवलोकन कर आवश्यक सुधार करे जाही।
छात्रावास अऊ आश्रम मन बर शैक्षणिक कैलेंडर घलो बनही। कक्षा नवमी ले बारहवीं तक के लईका मन ल विशेष कोचिंग घलो दे जाही। शैक्षणिक प्रोत्साहन बर स्थानीय स्तर म रहवईया इंजीनियरिंग, पॉलिटेक्निक, आईटीआई के शिक्षा ग्रहण करईया युवा मन ल बुलाके अतिथि शिक्षक के रुप म ओखर सेवा ले जाही। शिक्षा के स्तर म सुधार बर आश्रम म पढ़ईया लईखा मन के हर महीना टेस्ट घलो ले जाही। एखर संगे-संग पढ़ई-लिखई म कमजोर लईका मन ल कोचिंग दे के बाद ओखर आंकलन कर औसत निकाले जाही कि लईका कतेक पढ़ई लिखई म मजबूत होईस।
एखर अलावा अऊ अब्बड़ अकन फईसला ले गे हे जेमा छात्रावास भवन मन ह शौचालय विहीन नई रहे, जिहां महिला गार्ड हे उहां पहिली गार्ड रूम बनाए जाही, निर्माण एजेंसी मन के लगातार समीक्षा होही, अधूरा परे काम मन ल जल्दी ले पूरा करे जाही, हर महीना निगरानी समिति की बैठक होगी अऊ पालक-बालक सम्मेलन कराए जाही सहित कई फईसला ले गे हे।
No Comment! Be the first one.