हवाई जहाज ले घर लहुटही छत्तीसगढ़ के 274 श्रमिक, सीएम बघेल ह ट्वीट कर दे हे जानकारी

जय जोहार…. अभी तक आप मन ह झारखण्ड के मजदूर अऊ केरल के छात्र मन ल हवाई जहाज ले जाये के खबर ल सुने होही। अब ए कड़ी म छत्तीसगढ़ के घलो मजदूर मन के नाम ह जुड़ गे हे। जेन बंगलुरू अऊ हैदराबाद ले हवाई जहाज के जरिये रायपुर पहुंचही। ए बात के जानकारी ल स्वयं मुख्यमंत्री भूपेश बघेल ह ट्वीट कर दे हे।

मुख्यमंत्री भूपेश बघेल ह ट्वीट कर बताइस कि बंगलुरू अऊ हैदराबाद लॉ यूनिवर्सिटी के पूर्व छात्र मन के सहयोग ले क्रमश: 100 अऊ 174 श्रमिक मन ह विशेष विमान ले रायपुर पहुंचही। 274 मजदूर मन ल विमान म सफर करे के अवसर मिलही। मुख्यमंत्री बघेल ह लॉ यूनिवर्सिटी के पूर्व छात्र मन के सहयोग बर आभार व्यक्त करे हे। सीएम ह बताइस कि विमान ले अवइया सब्बो मजदूर मन ल ओखर गृह जिला के क्वारेंटाइन सेन्टर तक पहुंचाय के इंतजाम ल राज्य सरकार ह करत हे।