36 संविदा डॉक्टर मन ह नौकरी छोड़े के दे दिस अल्टीमेटम

रायपुर । छत्तीसगढ़ के दू सरकारी मेडिकल कॉलेज के 36 संविदा डॉक्टर ह नौकरी छोड़े के अल्टीमेटम दे दिसहे। उमन ह डीन ले एनओसी के मांग करे हे। मिले जानकारी के मुताबिक ये सब्बों डॉक्टर्स मध्यप्रदेश के सरकारी मेडिकल कॉलेज मन म नौकरी बर आवेदन करे हे। एखथर पीछू मध्यप्रदेश म नियमित नियुक्तियां होए के हवाला दिए जात हे।
सूत्र मन के कहिना हे कि डॉक्टर्स के अल्टीमेटम ले चिकित्सा शिक्षा विभाग म हड़कंप मच गेहे। एखर सेती अब छत्तीसगढ़ घलो मध्यप्रदेश के नियम ल लागू करे के कवायद म जुट गेहे। जिहां सोझे मेडिकल कॉलेज डीन / स्वशासी समिति ल नियमित नियुक्त के अधिकार हे ।
चिकित्सा शिक्षा संचालनालय ह ये संबंध म ड्राफ्ट तैयार कर ले हे। जेला लेके संचालक अउ कॉलेज मन के डीन ह स्वास्थ्य मंत्री अजय चंद्राकर ले मुलाकात करिन। चंद्राकर ह ये मन ल आश्वस्त करे हे कि जल्द रास्ता निकाले जाही। गौरतलब हे कि कि अभी मेडिकल कॉलेज मन म मेडिकल काउंसिल ऑफ इंडिया (एमसीआई) के निरीक्षण के दउर हे, अगर पद खाली रहही तो 3 कॉलेज मन के मान्यता खतरा म पड़ जाही।
चिकित्सा शिक्षा विभाग के संचालक डॉ. अशोक चन्द्राकर ह मीडिया ले चरचा म कहिन कि सब्बों राज्य मन म सैलरी स्ट्रक्चर अच्छा हे अउ स्थाई नौकरी देवत हे। ये ही वजह हे कि डॉक्टर्स एनओसी के मांग करत हवय। कोशिश करत हन कि मध्यप्रदेश जइसे अधिकार डीन ल घलो मल जाए। हमार ड्राफ्ट तैयार हे, जे शासन के समक्ष प्रस्तुत करे जाही।