Corona: जेल म बन्द आरोपी ह कोरोना पाजिटिव, थाना हो गे सील, पढो पूरा खबर

जय जोहार…. बिलासपुर जिला के सिविल लाइन थाना म बन्द दुष्कर्म के आरोपी ह कोरोना (corona) पाजिटिव पाय गे हे।

एखर सती पुलिस महकमा म हड़कंप मच गे हे। ऊहचे सिविल लाइन थाना ल सील कर के तारबाहर थाना ले कामकाज ल निपटाय जावत हे।
जानकारी के मुताबिक सिविल लाइन थाना म दर्ज दुष्कर्म के मामले म आरोपी ल पुलिस ह कनार्टक ले पकड़ के लाय हे। एखर बाद कराय गे जांच म आरोपी के रिपोर्ट ह कोरोना (corona) पाजिटिव आय हे।

जेखर सती सिविल लाइन थाना के सब्बो कर्मचारी मन के अब कोरोना जांच कराय के तैयारी करे जावत हे। ऊहचे थाना ल सील कर दे गे हे।
ए मामले म बिलासपुर एसपी प्रशांत अग्रवाल ह बताइस कि दुष्कर्म के आरोपी ह कोरोना (corona) पाजिटिव पाय गे हे। जेला तुरंत कोविड अस्पताल म भर्ती करे जावत हे।

ऐहतियातन थाना ल सील कर के सैनिटाइज करे जावत हे। थाना प्रभारी समेत सब्बो स्टाफ के सैम्पल ले जात हे। सब्बो ल होम क्वारेंटाइन करे गे हे।