रायपुर. दंतेवाड़ा जिला म होए नक्सली हमला म बीजेपी विधायक भीमा मंडावी के मउत के बाद उंखर पिता लिंगा मंडावी के एक बड़का बयान सामने आइस हे. मीडिया ले चर्चा करत हुए भीमा मंडावी के पिता लिंगा मंडावी ह गोंडी भाषा म कहिन के, मंगलवार बिहनिया उंखर घर म एक शख्स आय रिहिस हे. उंखर कहिना हे के, ओ व्यक्ति ह धमकी देय रिहिस के हमन तोर बेटा ल मार दे बो. संझा तक तोर तीर विधायक बेटा के लाश आही. उमन के कहिना हे के, अब वो ह वो नक्सली मन ल नई छोड़व जेमन ह मोर बेटा के हत्या करिस हे.
उहें पुलिस के आला अधिकारी मन ह ये दावा करे रिहिस के नक्सली मूवमेंट ल लेके विधायक भीमा मंडावी ल पहिली ही अलर्ट करेगे रिहिस हे. डीजी गिरधारी नायक ह दावा करिस के मंडावी ल ये क्षेत्र मन म न जाए के सलाह पहिली ही दे गे रिहिस हे. चुनावी सभा करके वापस लऊटत भीमा मंडावी के काफिला म नक्सला मन ह हमला करिन. डीजी एंटी नक्सल ऑपरेशन गिरधारी नायक के दावा हे के झीरम घाटी कांड के तरह ही नक्सली मन ह ये अटैक के तइयारी करे रिहिन हे.
बता देंवन के छत्तीसगढ़ के दंतेवाड़ा म लोकसभा चुनाव 2019 के पहिली चरन के वोटिंग ले महज 36 घंटे पहिली नक्सली मन ह ये बड़का हमला ल अंजाम देय हे. नक्सली मन ह मंगलवार के दंतेवाड़ा के कुआंकोंडा थाना क्षेत्र के श्यामगिरी नकुलनार रोड म बीजेपी के काफिला ल निसाना बनात हुए IED ब्लास्ट कर दिस. ये हमला म बीजेपी विधायक भीमा मंडावी सहित उंखर ड्राइवर अउ तीन पीएसओ के मऊत हो गिस.
Other Articles
No Comment! Be the first one.