जय जोहार । छत्तीसगढ़ सरकार (Chhattisgarh Government) ह महिला सुरक्षा के दिसा म खासकर बेटी के सुरक्षा, ओखर मान सम्मान के रक्षा, ओखर सुविधा अउ ओमन ल आवश्यक सेवा प्रदान करे बर एक ठीन अभिनव अभियान ’हमर बेटी-हमर मान’ प्रारंभ करे ल जावत हे। मुख्यमंत्री भूपेश बघेल ह आज ट्वीट कर ये जानकारी दीन हे।
वोहा किहीन कि ’हमर बेटी-हमर मान’ ए अभियान के तहत राज्य के पुलिस के महिला अधिकारी अउ कर्मचारी प्रदेस के सबो ज़िला म स्कूल-कॉलेज म जाके बेटी ल ओखर कानूनी अधिकार, गुड टच, बैड टच, छेड़खानी, यौन शोसण, साइबर क्राइम, सोसल मीडिया क्राइम ले बचाव अउ अधिकार जइसे बात म मार्गदर्सन देही अउ ओखर ले संवाद करही ।
अभियान के तहत गर्ल्स स्कूल, कॉलेज अउ महिला- युवती के उपस्थिति वाले प्रमुख जगह म पुलिस के स्पेसल महिला पेट्रोलिंग लगाए जाही । ’हमर बेटी हमर मान’ हेल्पलाइन बर एक मोबाइल नंबर घलो जारी करे जाही, जेमा बेटी अपन सिकायत, अपन परेसानी, अपन संग होवइया कोनो दुर्व्यवहार या अपराध के सूचना दर्ज करा पाही, जेमा प्राथमिकता ले कार्यवाही करे जाही । राज्य सरकार डहार ले ये घलो तय करे गेहे कि महिला संबंधी अपराध के विवेचना ल प्राथमिकता के आधार म महिला विवेचक ले ही करवाये जाही। महिला सुरक्षा बर लॉंच करे जवइया एप्लिकेसन के संबंध म स्कूल कॉलेज म जाके बताये जाही कि एखर इस्तेमाल कइसे करे जा सकत हे ।
Other Articles
