बिलासपुर। जिला निरवाचन अधिकारी इवीएम व सीयू यूनिट के फर्स्ट लेवल चेकिंग करे बर 17 जुलाई ले विभिन्न दल मन ल आमंत्रित करे हे। ये दउरान कांग्रेस ह निरवाचन अधिकारी ल पत्र लिख के चेकिंग म आवइया इंजीनियर व टेक्नीशियन मन के आईडी मांगिस हे। येकर संग उंखर प्रोफाइल के जानकारी घलो देय बर कहे। हर चुनाइ के बाद राजनीतिक पार्टी मन इवीएम म गड़बड़ी ल लेके शिकायत अउ सवाल खड़े करथे। छत्तीसगढ़ म घलो दिसंबर तक चुनाइ होय के संभावना हे। येला लेके कांग्रेस अभी ले सतरक नजर आवत हे।
इवीएम व सीयू यूनिट फर्स्ट लेवल के चेकिंग जिला निरवाचन अधिकारी मन के राजनीतिक दल मन के मउजूदगी म करवाही। कांग्रेस प्रदेश महामंत्री अटल श्रीवास्तव, शहर अध्यक्ष नरेन्द्र बोलर, ब्लाक अध्यक्ष तैयब हुसैन ह संयुक्त रूप ले जिला निरवाचन अधिकारी बिलासपुर ल पत्र लिखे कहे हे के टेस्टिंग म आय इंजीनियर मन अउ टेक्नीशियन मन के पहिचान पत्र दिखाय जाय। संगे संग उंखर प्रोफाइल के घलो जानकारी कांग्रेस पार्टी ल दे जाय। कांग्रेस प्रवक्ता अभय नारायण ह बताइस के कांग्रेस के प्रतिनिधि मण्डल कलेक्टर के अनुपस्थिति म अतिरिक्त कलेक्टर महेश उइके ले मिलके अपन मांग मन ल लेके पत्र सउपिन हे। प्रतिनिधि मंडल ह कहिन के कांग्रेस ये चाहत हे कि निरवाचन ले संबंधित समस्त कारय पूरनतः पारदरसी तरीका ले करे जाय।
