छत्तीसगढ़ के भाग बदलही ए चुनाव: शैलेष

रायपुर। छत्तीसगढ़ प्रदेस कांग्रेस कमेटी के महामंत्री अउ संचार विभाग के अध्यक्ष शैलेष नितिन त्रिवेदी के कहना हावे कि ए बखत के लोकसभा चुनाव ह छत्तीसगढ़ के भाग बदलही। अइसन एखर सेती कि मुख्यमंत्री भूपेश बघेल सरकार डाहर ले जइसन सुघ्घर कार्यक्रम चलाए जावत हे, ओखरो भविस केंद्र सरकार के ही नीति मा निर्भर करही।

केंद्र मा कांग्रेस के सरकार बन जाय के बाद छत्तीसगढ़ के भूपेश सरकार अउ उंखर जनहित बार नवा नवा नीति ला तको नवा ताकत मिलही। शैलेस नितिन के कहना हे कि छत्तीसगढ़ के नवगठित कांग्रेस सरकार ह अपन कार्यकाल के तीन महीना मा ही कई नवा इतिहास रच दिखाईन। अउ अइसने काम के बल मा ही छत्तीसगढ़ के लोगन मन के भरोसा जितिन।

राज्य के कांग्रेस सरकार ह साबित कर दिखाइस कि इही सरकार ह छत्तीसगढ़ के किसान, मजदूर अउ गरीब मन के सच्चा हितैसी आय।

शैलेष नितिन के आगे कहना हे कि केंद्र मा बइठे मोदी सरकार के रवैया हा छत्तीसगढ़ के प्रति बिल्कुल उपेक्षित हे। एखरे ले उबरे बर अब केंद्र मा सत्ता परिवर्तन कर के कांग्रेस के सरकार लाना बेहद जरूरी हे।

ओमन के कहना हे कि नरेंद्र मोदी सरकार के रवैया लगातार छत्तीसगढ़ विरोधी, मज़दूर-किसान विरोधी अउ गरीब विरोधी रहे हे। भाजपा के रमन सिंह सरकार के राज मा छत्तीसगढ़ मा गरीबी तेज़ी से बढ़े हे। लेकिन केंद्र में कांग्रेस के सरकार बन जाए के बाद छत्तीसगढ़ मा भी वीकास के नवा रद्दा खुल जाही।