chhattisgarh म कोरोना टीकाकरण के आंकड़ा 5 करोड़ ले पार, 15 ले 18 बछर के 62 फीसद किसोर ल लगीन दूनों टीका

जय जोहार । (chhattisgarh) छत्तीसगढ़ म कोरोना टीकाकरण के आंकड़ा ह पांच करोड़ ले जादा हो गेहे । कोविड-19 ले बचाव बर प्रदेस भर म अब तक कुल पांच करोड़ दस हजार 332 टीका लगाए गेहे । एमा ले दो करोड़ 24 लाख 49 हजार 317 टीका पहला डोज, दो करोड़ दो लाख 65 हजार 722 दुसरइया डोज अउ 72 लाख 95 हजार 293 टीका प्रिकॉसन डोज के तौर म लगाए गेहे ।

(chhattisgarh) प्रदेस म 18 बछर ले जादा के 94 फीसद आबादी ल कोरोना ले बचाव के दूनों टीका लगाये जा चुके हे। उहें 15 ले 18 बछर के 62 फीसद किसोर मन ल एखर दूनों टीका लगाये जा चुके हे । प्रदेस म 12 ले 14 बछर के 55 फीसद लईका मन ल घलो दूनों खुराक दे जा चुके हे ।

राज्य म 18 बछर ले जादा के एक करोड़ 85 लाख 13 हजार 230 नागरिक, 15 ले 18 बछर उमर वर्ग के दस लाख 21 हजार 128 किसोर अउ 12 ले 14 बछर उमर वर्ग के सात लाख 31 हजार 364 लईका मन ल कोविड वैक्सीन के दूनों खुराक दे जा चुके हे ।

(chhattisgarh) राज्य म 17 लाख 78 हजार 411 स्वास्थ्य कर्मी, फ्रंटलाइन वर्कर अउ 60 बछर ले जादा के मनखे अउ 18 ले 59 बछर के 55 लाख 16 हजार 822 नागरिक मन ल प्रिकॉसन डोज घलो लगाये जा चुके हे ।