अब पुलिस वर्दी म दिखही अनुज के दबंगई ह

रायपुर । छालीवुड के सुपरस्टार पद्मश्री अनुज शर्मा के छत्तीसगढ़ी फिल्म ‘दबंग दरोगा’ के पोस्टर अउ टीजर रिलीज करे गिस हे। विधानसभा अध्यक्ष गौरीशंकर अग्रवाल ह शैलेन्द्र नगर स्थित अपन निवास म ये फिल्म के पोस्टर अउ टीजर यू-ट्यूब म लॉन्च करिन। उमन ह फिल्म के सफलता बर पूरा टीम ल अपन शुभकामनाएं दीस हे।
बता देन के ये फिल्म के निर्माता नटराज बंछोर हे अउ निर्देशक अभिषेक सिंह हे। फिल्म के गीत मन ल संगीत ले सजाय हे म्युजिक डॉयरेक्टर सुनील सोनी हे। ये फिल्म ‘दबंग दरोगा’ 10 अगस्त के प्रदेश के सिनेमा घर मन म रिलीज होही। ये मउवका म फिल्म के कलाकार जीत शर्मा, रजनीश झांझी, अनिल शर्मा, रीमा सिंह, उपासना वैष्णव, चिमन डामेंद्र सिंन्हा घलो मवजूद रहिन हे।
दर्शक मन के चहेता अउ सफलतम ​अभिनेता
छालीवुड के सुपरस्टार अनुज शर्मा ह येखर पहिली कई सुपर-डुपर फिल्म दे चुके हे। छत्तीसगढ़ राज्य बने के बाद उमन के आए फिल्म मोर छईहा भुईया ह प्रदेश म नवा कीर्तिमान रचे हे। ये फिल्म के सफलता म उमन प्रदेश म अहम पहचान दिलाइस। ये उमन के पहिली फिल्म रिहिस हे। येखर सफलता ह छत्तीसगढ़ी फिल्म मन के नवा दउर सुरू करिस हे। येखर बाद उमन ह फेर पीछु मुड़ के नइ देखिस। आज वो ह छत्तीसगढ़ी दर्सक मन के चहेता अउ सफलतम ​अभिनेता हे। अभिनय अउ कला के क्षेत्र म उमन के योगदान ल देख के केंद्र सरकार ह उमन ल पद्मश्री ले सम्मानित करिस हे। येखर अलावा उमन ल राज्य स्तर म भी कई ठन सम्मानीय पुरस्कार मिल चुके हे। उमन कम समय म छत्तीसगढ़ समेत देश म अपन विसेष पहिचान बनाय हे।