रायपुर।एक झन मनखे ह जिला के दोरनापाल इलाका में एक नक्सली संगठन म हथियार बनाये के काम करत रहिस हे। कुछु समय पहिली ओह पुलिस के आघू सरेंडर करे रिहिस हे। तब ले नक्सली मन ह ये परिवार उपर नजर गड़ाए रिहन हे। अउ अब एक ठन फरमान जारी करे हे। जेमा परिवार के जम्मो 17 लोगन ल गांव ले चले जाय बर नक्सली मन ह कहिन हे। नक्सली फरमान ले मजबूर ग्रामीण गांव छोड़े म मजबूर हो गे हे। पीड़ित परिवार ह न्याय बर दोरनापाल पुलिस ले मदद के गुहार लगाइस हे।
मिली जानकारी के अनुसार ये घटना चिंतागुफा थाना क्षेत्र के बचपाड़ गांव के हे। ये गांव के एक परिवार के 17 लोगन ल गांव छोड़े के फरमान नक्सली मन सुनाए हे। पीड़ित ग्रामीन मन ह बताइन कि नक्सली कमांडर केसा ह गांव म बइठक लेके ये फरमान जारी करे हे । नक्सली मन के आरोप हे कि परिवार ले सदस्य पुलिस मुखबिर हे।आघू ग्रामीन मन बताइन कि नक्सली मन फरमान सुनाये के बाद ग्रामीन के घर के सबों सामान ल लूट लिन। पीड़ित परिवार के ग्रामीन मन ह दोरनापाल थाना म मदद के गुहार लगाइस हे। परिवार के लोगन मन ल फिलहाल पुलिस सुरक्षा देवत हे। ग्रामीन मन के के शिकायत म दोरनापाल थाना म मामला दरज करे गेहे।
