जय जोहार । (Raipur) छत्तीसगढ़ स्कूल शिक्षा विभाग ल एक घांव पुनः अपन उत्कृष्ट काम बर राष्ट्रीय स्तर के पुरस्कार ले के अवसर प्राप्त होए हे । राज्य म समग्र शिक्षा डहार ले संचालित “अंगना म शिक्षा” कार्यक्रम के तहत बछर 2022 म करे गे काम बर स्कॉच अवार्ड 2022 प्राप्त होए हे । ये पूरा कार्यक्रम छत्तीसगढ़ के महिला शिक्षिका के समूह डहार ले संचालित करे जावत हे । ए बछर ये कार्यक्रम के तीसरइया बछर होही अउ हरेक बछर एमा महिला नेतृत्व डहार ले कुछु नवा डिजाइन सामिल करे जावत हे । मुख्यमंत्री भूपेश बघेल अउ स्कूल शिक्षा मंत्री डॉ. प्रेमसाय सिंह टेकाम ह ए अवार्ड बर विभाग अउ राज्य के शिक्षिका ल बधाई दीन हे ।
उल्लेखनीय हे कि स्कॉच अवार्ड एक ठन स्वतंत्र संगठन डहार ले प्रदत्त देस के सर्वाेच्च नागरिक सम्मान हे , जेन मनखे, परियोजना अउ संस्थान के पहचान करत हे, जेन भारत ल एक बेहतर राष्ट्र बनाय बर अतिरिक्त परयास करत हे । ए अवार्ड ल बछर 2003 म स्थापित करे गे रिहीन । ये अवार्ड डिजिटल, वित्तीय अउ सामाजिक समावेश के क्षेत्र म सर्वाेत्तम परयास बर प्रदाय करे जात हे ।
कोरोना के बेरा जब स्कूल शिक्षा विभाग के पूरा अमला लईका मन के पढ़ाई ल जारी रखे बर सरलग प्रयासरत रिहीन अउ शिक्षक के ए काम बर प्रोत्साहित करत हुए नवा-नवा तरीका ले लईका मन के पढ़ाई ल जारी रखे के कोशिश सतत् करे जावत रिहीन । ए बेरा राज्य के कुछु महिला शिक्षिका ह ए राज्यव्यापी कार्यक्रम “पढ़ई तुंहर दुआर” म अपन योगदान के प्रस्ताव रखीन । वोहा माता ल प्रशिक्षित कर ओखर माध्यम ले घर म रहत हुए ही लईका मन ल सिखाए के प्रयास ल “अंगना म शिक्षा” के रूप म प्रारंभ करीन ।
