रायपुर. हमर विधानसभा के मानसून सत्र 12 जुलाई ले होही। 6 दिन के होवईया ए सत्र बर सदस्य मन ह 946 सवाल लगाए हे। सत्र ह 12 जुलाई ले 19 जुलाई तक चलही। इही दरी सदन म छह होही। ऐमा सरकार अनुपूरक बजट के संगे-संग सात संशोधन विधेयक घलो लाए के तियारी म हे। दूसर कोती विपक्षी दल भाजपा ह कई मुद्दा ल लेके सरकार ले घेरे के रणनीति तियार करत हे। बता देन कि सत्र बर प्रश्न लगाने वाला मन में सत्ताधारी पार्टी कांग्रेस के विधायक मन के संख्या जादा हे।
विधानसभा सचिवालय ले मिले जानकारी के अनुसार प्रश्न लगाए बर निर्धारित समय सीमा म कुल 946 प्रश्न के सूचना ह मिले हे। ऐमा 495 तारांकित अऊ 451 अतारांकित प्रश्न सामिल हाबे। सत्र के पहिली दिन प्रश्नकाल म सवाल मन के सुरुआत मुख्यमंत्री भूपेश बघेल के विभाग ले करे जाही। सरकार कोती ले सत्र म चालू वित्तीय वर्ष के पहिली अनुपूरक बजट घलो पेश करे के संभावना हे। बताए जात हे कि अनूपूरक बजट ल लेके वित्त विभाग एखर तियारी म लगे हे। चार हजार करोड़ के आसपास अनुपूरक बजट हो सकत हे।
No Comment! Be the first one.