जय जोहार। (Raipur ) सीएम भूपेश बघेल ह प्रदेस म संचालित बाल देख-रेख संस्था ले बाहर जवइया बालक-बालिका के पुनर्वास बर ए बछर बजट म बड़का निर्णय लेत हुए ओखर बर मुख्यमंत्री बाल उदय योजना प्रारंभ करे के घोसना करीन हे । ये योजना प्रदेस के बाल गृह ले बाहर जवइया लईका मन के भावी जिनगी बर सही राह दिखाके ओमन ल स्वावलंबन म मदद करही । एखर बर बजट म 1 करोड़ रुपिया के प्रावधान करे गेहे । संगेसंग बाल संप्रेक्षण गृह ले बाहर जाय के उमर 18 बछर ले बढ़ाके 21 बछर करत हुए पुनर्वास योजना बनाए गेहे ।
ए योजना के तहत बाल देख-रेख संस्था ले बाहर जवइया 18 बछर ले जादा उमर के बालक-बालिका ल पुनर्वासित अउ पुनर्स्थापित करे बर राज्य सरकार सहयोग देही। पहले पुनर्वास केंद्र ले बाहर जवइया कई लईका मन के सामने आवास,रोजगार समेत समाज के मुख्यधारा म सामिल होके आगू बढ़े म कई दिक्कत आत रिहीन । ए परिस्थिति म कई घांव लईका अपराध ड हार घलो अपन कदम बढ़ा लेत हे । एला देखत हुए मुख्यमंत्री भूपेश बघेल ह ए लईका मन बर एक ठन संवेदनशील पहल करे हे । मुख्यमंत्री के निर्देस म महिला अउ बाल विकास विभाग मंत्री अनिला भेंड़िया के नेतृत्व म बाल गृह से बाहर जवइया बालक-बालिका ल पुनर्वासित अउ पुनर्स्थापित करे बर विस्तृत कार्ययोजना तईयार करे जावत हे ।
पुनर्वास योजना म बालक-बालिका ल उच्च शिक्षा बर आवश्यक आर्थिक सहायता के व्यवस्था, रोजगार सुनिश्चितता, आवास समेत अन्य सुविधा उपलब्ध कराए के प्रावधान करे गेहे । मुख्यमंत्री ह देख-रेख संस्था ले बाहर जवइया बालक-बालिका बर योजना म सामुदायिक सामूहिक आवास के व्यवस्था के प्रावधान करे के निर्देस घलो देहे ।
No Comment! Be the first one.