Home सियासत आदिवासी विधायक बनिस प्रदेश कांग्रेस के नवा अध्यक्ष, करिस आदिवासी मन के...

आदिवासी विधायक बनिस प्रदेश कांग्रेस के नवा अध्यक्ष, करिस आदिवासी मन के सम्मान

65
0
markaam

जय जोहार. मोहन मरकाम के जनम 15 सितंबर 1967 के ग्राम टेड़मुण्डा पोस्ट बवई, तहसील माकड़ी जिला कोण्डागांव़ में होईस। इंखर पिता जि के नाम स्व. भीखराय मरकाम आय । 7 भाई अउ 2 बहनी म मरकाम जी 5 वॉ सन्तान हावे ।इंखर प्राथमिक शिक्षा ग्राम टेड़मुण्डा में होईस, जिहां शाला भवन न होए ले झोपड़ी म शाला म ही विद्या अध्ययन करिस।

माध्यमिक शिक्षा 7 किमी दुर घना जंगल ले पैदल रास्ता तय कर के माध्यमिक शाला काटागांव म पूरा करीस । हाई स्कूल अउ हायर सेकेण्डरी के शिक्षा माकड़ी म अउ कालेज के पढ़ाई कांकेर महाविद्यालय ले भूगोल विषय से एम.ए के शिक्षा प्राप्त करिस । इंखरो रूचि कानून के पढई म रहीस एखर बर मरकाम जी ह जगदलपुर म रही के 2 साल तक कानून के पढाई करीस।इहि बीच म शासकीय नौकरी मिले ले कानून के पढ़ाई बीच म ही छुट गे ।

मोहन मरकाम छात्र जीवन ले ही राजनीति में सक्रिय होगे रिहिस । छात्र संघ के अध्यक्ष अउ उपाध्यक्ष के रूप म जिम्मेदारी के निवर्हन करीस । छात्र राजनीति म सक्रिय होए के कारण समस्या के निराकरण बर हमेशा तत्पर रहय। एनसीसी म सीनियर अंडर अफसर रहैय्या अउ गणतंत्र दिवस, नई दिल्ली के परेड म चयनित होईस ।

एखर बाद वर्ष 1990-91 म शहीद महेन्द्र कर्मा जी के सानिध्य म कांग्रेस पार्टी ले जुड़े के बाद वर्ष 1993, 1998, 2003 के विधानसभा चुनाव म कांग्रेस पार्टी ले टिकट के दावेदारी भी करिस लेकिन टिकट नई मिलिस , बावजूद एखर वो ह कांग्रेस पार्टी के प्रति वफादारी निभात हुए कार्य करत रिहिस अउ कांग्रेस समर्थित प्रत्याशी ल जिताय म जी जान से जुड़े रहाय । संगे संग पार्टी द्वारा आयोजित कार्यक्रम मन ल सफल बनाए अउ जन जन तक पहुंचाए बर निरंतर प्रयास करत रहीस।

एखर बाद विधानसभा चुनाव 2008 म कांग्रेस पार्टी ह पहिली बार मोहन मरकाम ल अपन प्रत्याशी बनायिस अउ भाजपा प्रत्याशी व छत्तीसगढ़ शासन में मंत्री (सुश्री लता उसेण्डी) ले ओखर सीधा मुकाबला होईस जेमा ओला 2771 मत ले हार के सामना करना पड़ीस। ओखर बाद फिर से 2013 में कांग्रेस ह मोहन मरकाम ल टिकट दिस अउ ए बार वो ह भाजपा प्रत्याशी लता उसेंडी ल शिकस्त दे दिस। अइसने 2018 के विधानसभा चुनाव में भी कांग्रेस पार्टी ले लड़त हुए फिर से भाजपा प्रत्याशी ल हराईस अउ फेर विधायक बनीस। चतुर्थ विधानसभा सत्र 2013 से 2018 बर ओला विधानसभा म उत्कृष्ट विधायक के सम्मान भी दे गिस ।

विधानसभा चुनाव के संगे संग नगर पालिका चुनाव म भी मोहन मरकाम ह अपन उपयोगिता साबित करीस 2014 म उंखर नेतृत्व म कोण्डांगाव नगर पालिका के चुनाव संपन्न होईस जेमा नगरपालिका अध्यक्ष, उपाध्यक्ष सहित पार्टी ह 22 में से 16 वार्ड म जीत हासिल करीस । इहि प्रकार 2015 म जिला पंचायत के चुनाव म भी उंखर भूमिका सराहनीय रहीस। जेमा जिला पंचायत अध्यक्ष, उपाध्यक्ष सहित 12 में से 9 सदस्य मन जीत हासिल करिस। उंही कोण्डागांव विधानसभा क्षेत्र म अधिकतर पंच अउ सरपंच मन पार्टी के बैनर तले जीत हासिल करीस ।

लोकसभा चुनाव 2019 म मरकाम जी ह कांग्रेस प्रत्याशी बर जी तोड़ मेहनत करिस अउ प्रचंड मोदी लहर के बाद भी कोण्डागांव विधानसभा क्षेत्र ले कांग्रेस प्रत्याशी ल 12890 वोटों के बढ़त दिलाईस । ये तमाम उपलब्धि ले उंखर क्षेत्र म पकड़ अउ प्रभाव स्पष्ट दिखाई देथे । जिला कांग्रेस कमेटी ले लेके, प्रदेश कांग्रेस कमेटी अउ अखिल भारतीय कांग्रेस कमेटी तक के कार्यक्रम मन म सहभागिता निभाना अउ अपन सहयोग देना इंखर आदत म शामिल हे ।

राजनीति के अलावा सामाजिक अउ सहकारी क्षेत्र म भी मोहन मरकाम के सहभागिता काफी सराहनीय रहीस हे । आदिवासी गोण्ड समाज के अध्यक्ष अउ आदिवासी विकास परिषद के संभागीय उपाध्यक्ष भी बनाय गिस । उंही सहकारी क्षेत्र म काम करत हुए वो ह किसान अउ एवं ग्रामवासी मन बर जागरूकता कार्यक्रम भी चलाइस जेखर माध्यम ले शासन द्वारा मिलने वाला लाभ अउ योजना ले अवगत कराए के कार्य करीस।

जनहित ले जुड़े मुद्दा म कार्य करत हुए मोहन मरकाम ह कई ठन आंदोलन म अपन सक्रिय भूमिका निभाईस। नसबंदी कांण्ड के विरोध म वो ह पेण्डारी, बिलासपुर ले रायुपर तक 150 किमी के पदयात्रा करीस । उंही किसान के बोनस अउ अन्य मांग ल लेके बलौदाबाजार ले रायपुर तक 50 किमी के पदयात्रा करिस । वो ह राष्ट्रीय अध्यक्ष राहुल गांधी के संग किसान के समस्या अउ भूमि अधिग्रहण अध्यादेश के विरोध म भी पदयात्रा करिस । उंही चुनाव पूर्व पार्टी द्वारा आयोजित परिवर्तन यात्रा में प्रदेश अध्यक्ष भूपेश बघेलअउ नेता प्रतिपक्ष रहे टीएस सिंहदेव के संग जगदलपुर ले कोण्डागांव अउ डोंगरगढ़ ले रायपुर तक पैदलयात्रा म शामिल रहीस । एखर अलावा प्रदेश व क्षेत्र के खुशहाली बर क्षेत्र के लोगन अउ सैकड़ों श्रृद्धालु मन के साथ बस्तर के अराध्य देवी मां दंतेश्वरी के द्वार दंतेवाड़ा तक 170 किमी के लगातार 03 बछर तक पदयात्रा कर के अमन चैन के प्रार्थना करिस।

मोहन मरकाम ह कांग्रेस पार्टी बर कार्य करत हुए अपन पूरा विधानसभा क्षेत्र 83 म सदस्यता अभियान बर सायकल ले यात्रा करीस अउ लोगन ल पार्टी ले जोड़े के कार्य करीस । मोहन मरकाम पार्टी के संगठन म बुथ अध्यक्ष, ब्लॉक कांग्रेस कमेटी के अध्यक्ष, जिला प्रतिनिधि, प्रदेश कांग्रेस कमेटी सदस्य अउ वर्तमान म अखिल भारतीय कांग्रेस कमेटी के सदस्य हे। पूर्व प्रदेश अध्यक्ष माननीय धनेन्द्र साहू जी, पूर्व प्रदेश अध्यक्ष माननीय चरण दास महंत जी के साथ संगठन म काम करे के अवसर प्राप्त होईस ।

पांच साल म वर्तमान प्रदेश अध्यक्ष व छत्तीसगढ़ शासन के मुख्यमंत्री माननीय भूपेश बघेल जी, पूर्व नेता प्रतिपक्ष व पंचायत मंत्री माननीय टी एस सिंहदेव जी के जुगलबंदी के साथ लगातार संगठन के हर गतिविधियों म कदम से कमद मिलाके शामिल रहीस ।

मोहन मरकाम ह शासकीय सेवा के रूप में शिक्षाकर्मी वर्ग 1 व शिक्षाकर्मी वर्ग 2 के रूप म भी कार्य करीस एखर अलावा वो ह कुछ दिन तक भारतीय जीवन बीमा निगम म विकास अधिकारी अउ भारतीय स्टेट बैंक लाईफ म सीनियर एजेंन्सी मैनेजर के रूप म भी कार्य करिस , मगर जनहीत के सेवा करे के ललक ह ओला शासकीय व अर्द्ध शासकीय सेवा ले इस्तिफा दिलाइस अउ 4-4 शासकीय सेवा छोड़के आज ये मुकाम म पहुचे हे।

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.