जय जोहार । (chhattisgarh) कृषि,जल संसाधन, पंचायत अउ ग्रामीण विकास मंत्री मंत्री रविंद्र चौबे ह आज अपन निवास कार्यालय म आयोजित कार्यक्रम म प्रदेस व्यापी स्वच्छता ही सेवा अभियान के सुभारंभ करीन । मंत्री श्री चौबे ह ए मउका म राज्य म जन जागरूकता बर स्वच्छता रथ ल हरी झंडी दिखाके रवाना करीन। ये स्वच्छता रथ 15 सितंबर ले 2 अक्टूबर तक राज्य म स्वच्छता के प्रति मनखे मन ल जागरूक करे बर हाट- बाजार अउ गांव के भ्रमण करही।
हरेक बछर के तरह ए बछर घलो 15 सितम्बर ले 2 अक्टूबर 2022 तक ’स्वच्छता ही सेवा’ अभियान पूरा प्रदेस म चलाये जात हे । (chhattisgarh) एखर उद्देश्य गांव म स्वच्छता बर जनजागरूकता लाना हे । स्वच्छता ही सेवा अभियान के अंतर्गत 15 सितम्बर ले 2 अक्टूबर तक सबो ग्राम म जमा कूड़ा कचरा ल श्रमदान के माध्यम ले सफाई करे जाही। एखर अंतर्गत सार्वजनिक स्थल के साफ-सफाई, सोकपिट के निर्माण, कम्पोस्ट पिट के निर्माण , प्लास्टिक अपशिष्ट एकत्रीकरण, घर-घर कचरा एकत्रीकरण बर सामूहिक श्रमदान करे जाही।
स्वच्छ भारत मिशन ग्रामीण के तहत ए बछर 8000 गांव ल ओडीएफ बनाय के लक्ष्य हे । स्वच्छता ही सेवा अभियान के तहत जिला मुख्यालय ले लेके गांव तक कई ठीन गतिविधि के आयोजन करे जाही अउ जेन गांव ह ओडीएफ प्लस श्रेणी म आ गेहे , ओमन ल ओडीएफ घोसित करे के कार्रवाई घलो करे जाही ।
ए अवसर म स्वच्छ भारत मिशन के संचालक संजय अग्रवाल , जिला पंचायत रायपुर के मुख्य कार्यपालन अधिकारी रवि मित्तल, सबो राज्य सलाहकार स्वच्छ भारत मिशन उपस्थित रिहीन ।
