बस्तर के आदिवासी मन ह अब सीधा लोहा लें लेही नक्सली मन ले

बस्तरिया बटालियन के पासिंग आउट परेड
अंबिकापुर। माओवादी मन के ख़िलाफ़ बस्तर के आदिवासी मन ह अब सीधा लोहा लें लेही। सीआरपीएफ ह बस्तर के युवा मन अउ युवती मन ले लेके बस्तरिया बटालियन 241 के गठन करे हे। जे ह आज ले काम करे बर बस्तर म उतरही। रविवार के ये बटालियन के पासिंग आउट परेड गृहमंत्री राजनाथ सिंह अउ मुख्यमंत्री डा.रमन सिंह के हाजरी म होइस हे । ये पासिंग आउट परेड ल देखके राजनाथ सिंह ह खुस होगे अउ जमके उंखर जमकर तारीफ करिन।
आपमन ल बता दन कि ये बटालियन म बस्तर के बीजापुर नारायणपुर दंतेवाड़ा अउ सुकमा के 534 युवक अउ 189 युवती मन ल सामिल करे गेहे। बस्तरिया बटालियन 241 ल गोरिल्ला युद्ध, छद्म युद्ध , बिना खाये पिये लड़े अउ जंगल लड़ाई के जमो तकनीक म दक्ष करे गेहे।
ये बखत म केन्द्रीय गृहमंत्री राजनाथ सिंह ह कहिन कि प्रतिभा मन सिरिफ शहर अऊ आलिशान अट्टालिका मन म रहइया सुख-सुविधा पाए मनखे मन ले ही नइ पैदा होवय, बस्तर जइसे सुदूरू ग्रामीण वनांचल के क्षेत्र मन के मनखे मन म घलोक प्रतिभा पैदा होथे। उमन कहिन के केन्द्रीय सुरक्षा बल अऊ पुलिस बल के बेहतर समन्वय ले बढ़िया काम करके माओवादी प्रभावित क्षेत्र मन म शांति स्थापित करे म मदद करत हे। केन्द्रीय गृहमंत्री श्री सिंह ह सरगुजा जिला के केपी ग्राम स्थित केन्द्रीय सुरक्षा बल के 241 वीं बटालियन के सीआरपीएफ प्रशिक्षण केन्‍द्र म बस्तरिया बटालियन के दीक्षांत परेड समारोह ल सम्बोधित करिन। उमन ए अवसर म कई ठन क्षेत्र मन म उल्लेखनीय उपलब्धि हासिल करइया जवान मन ल सम्मानित करिन।