Raipur : पटेल-मरार समाज ह बाड़ी योजना के लाभ उठाके बन सकत हे आर्थिक रूप ले सशक्त: भूपेश बघेल

जय जोहार। (Raipur) मुख्यमंत्री भूपेश बघेल ह आज अपने निवास कार्यालय म पटेल-मरार समाज डहार ले आयोजित शाकम्भरी महोत्सव म सामिल होइन । मुख्यमंत्री ह माता शाकम्भरी के पूजा-अर्चना कर सबो ल सुभकामना दीन।

ए अवसर म मुख्यमंत्री ह किहीन कि पटेल-मरार समाज सब्जी के उत्पादन म अग्रणी हे । बाजार म आप मन डहार ले पैदा करे गे सब्जी अच्छा गुणवत्ता के होत हे, एखर ले सबले पहिली बिकत हे। मुख्यमंत्री ह पटेल-मरार समाज ले आग्रह करीन कि आप मन सबो सरकार के बाड़ी योजना के लाभ जरूर उठाव। एखर ले कम लागत म सब्जी के उत्पादन बढ़ही ।

सरकार डहार ले रूरल इंडस्ट्रियल पार्क सुरु करे जात हे। उंहा ड्राई मशीन के उपयोग कर सब्जी के आकर्षक पैकिंग कर के बाजार म अच्छा दाम ले जा सकत हे । आप मन सबो समूह बनाके बाड़ी योजना के माध्यम ले आर्थिक रूप ले सशक्त बन सकत हे । वोहा किहीन कि आज के बेरा मौसमी सब्जी पूरा बछर उपलब्ध रहत हे , काबर कि कृषि वैज्ञानिक ह कई शोध करे हे अउ सिंचाई के सुविधा घलो बढ़ गेहे ।

ए अवसर म विधासभा उपाध्यक्ष संतराम नेताम, विधायक बृहस्पत सिंह, विनय भगत, मुख्यमंत्री के सलाहकार प्रदीप शर्मा, शाकम्भरी बोर्ड के अध्यक्ष रामकुमार पटेल, देवचरण पटेल, रामसुंदर पटेल, पवन पटेल, आत्मनारायण पटेल उपस्थित रिहीन ।