दीपक बावनकर
जय जोहार. विदेस म सूट होय पहिली छत्तीसगढ़ी फीचर फिलम “प्रेम के बंधन“ 6 जुलाई ले रायपुर समेत अन्य 6 सिनेमाघर मन म प्रदर्सित होय बर तैयार हे। सुपर स्टार अनुज शर्मा अउ लवली अहमद के जोड़ी ल दर्सक मन देखे बर बेताब हे। अब फिलिम ह रिलीज होए के बादे पता चलही कि दर्सक मन म ए फिलिम ह का असर।
फिलिम के बात करन त शिव नरेश केसरवानी जेन ह एखर डायरेक्टर हे ओखर ए 134 वां फिलिम हे। मोहिनी चंदू और चांदनी जैइसे फिलिम म अपन निर्देसन के लोहा मनवा चुके कर चुके हे। केसरवानी ह ये फिलिम म अच्छा काम करे के कोसिस करे हे। फिलम गाना मन समेत कुछु सीन के सूटिंग विदेश म करे गेहे। एखर सति ऐ फिलिम के दृस्य ह घलो मनमोहक लगत हे। केमरामेन राजकुमार बघेल अउ संतोष सोनू ह खूब मेहनत करे हे। फिलिम ल सुंदर दिखाय बर ऐ फिलिम ल बड़े बजट के फिलिम कहे जा सकत हे। काबर कि निर्माता अशोक ठाकुर फिलिम संग कोनो समझौता नई करे हे।
फिलिम म इहां के गायक-गायिका मन के अलावा मुबंई के सुपर गायक उदित नारायण ह घलो अपन आवाज दे हे। छत्तीसगढ़ी फिल्म मन के सुपर स्टार अनुज शर्मा वईसे तो लोगन मन के बीच म लोकप्रिय हे अउ अभिनेत्री लवली अहमद ह घलो छत्तीसगढ़ी फिलिम इंड्रस्ट्री ले रहे। ऐ कारण ओखर मन के एक्टिंग ल दमदार बताए जात हे। एखर अलावा प्रदीप शर्मा अउ उपासना वैष्णव ह फिलम म पारिवारिक महोल पइदा करे म कोनो कमी नइ करे हे। फिलिम के गीत विमल यादव ह लिखे हे जेला संगीतबद्ध करे हे प्रफुल्ल बेहरा ह अउ डांस डायरेक्टर निशांत उपाध्याय हे। बहरहाल फिलम म सबो कुछु त नजर आवत हे लेकिन ऐखर भाग्य के पिटारा 6 ले 13 जुलाई के बीच खुल जाही। जब दर्शक मन के रिस्पांस फिलिम ल देखे बर सिनेमाघर म जुटही।
