जय जोहार। छत्तीसगढ़ (chhattisgarh) म समर्थन मूल्य म धान खरीदी के महाभियान सरलग जारी हे। प्रदेस म समर्थन मूल्य म किसान मन ले 12 जनवरी संझा 5.30 बजे तक 95.29 लाख मीट्रिक टन धान के खरीदी हो गेहे। धान खरीदी के एवज म 21.80 लाख ले जादा किसान मन ल लगभग 19,675 करोड़ रुपिया के भुगतान ल बैंक लिंकिंग व्यवस्था के तहत करे गेहे ।
ए बछर धान खरीदी के संगेसंग कस्टम मिलिंग बर सरलग धान के उठाव जारी हे । अब तक 81 लाख मीट्रिक टन धान के उठाव बर डीओ जारी करे गेहे, जेखर विरूद्ध मिलर्स डहार ले 70 लाख मीट्रिक टन धान के उठाव ल करे जा चुके हे । अधिकारी मन ह बताइन कि 12 जनवरी के 35 हजार 719 किसान मन ले 1.48 लाख मीट्रिक टन धान के खरीदी करे गेहे । एखर अलावा ऑनलाइन प्राप्त टोकन ले किसान मन ले 11 हजार टन धान के घलो खरीदी होए हे । अवइया दिवस के धान खरीदी बर 45 हजार ले जादा टोकन अउ ”टोकन तुंहर हाथ एप” के जरिये लगभग 3 हजार ले जादा टोकन ऑनलाइन जारी करे गेहे।
गौरतलब हे कि ए बछर राज्य म 25.92 लाख किसान मन के पंजीयन होए हे, जेमा ले लगभग 2.26 लाख नवा किसान सामिल हे । राज्य म धान खरीदी बर 2600 उपार्जन केन्द्र बनाए गेहे । सामान्य धान 2040 रुपिया प्रति क्विंटल अउ ग्रेड-ए धान 2060 रुपिया प्रति क्विंटल की दर ले खरीदे जात हे ।
Other Articles
