रायपुर । छत्तीसगढ़ विधानसभा म मानसून सत्र के दूसर दिन के सुरुआत घलो हंगामा के संग होइस। मंगलवार के नेता प्रतिपक्ष ह तीन विधायक मन के निस्कासन के मांग करिन अउ विधायक दल के बइठक म रेणु जोगी ल नइ बुलाय ल लेके चर्चा होइस। भाजपा ह रेणु जोगी ल नइ बुलाय ले उंखर अपमान बताइस हे। येकर अलावा दूसर मुद्दा मन म विपक्ष के सवाल मन म जवाब देय बर सरकार जुझत नजर आइस।
सदन म भाजपा विधायक देवजी भाई पटेल ह स्वच्छ भारत योजना म क्षेत्र मन म व्यक्तिगत सउचालय निरमान के मुद्दा उठाइस। कांग्रेस विधायक अमरजीत भगत ह सरगुजा संभाग म मनरेगा म मजदूरी भुगतान के मुद्दा उठाइस। सदन म कांग्रेस विधायक लालजीत सिंह राठिया ह मनरेगा म काम के बाद लंबित भुगतान के मामला उठाइस। येमा पंचायत मंत्री अजय चंद्राकर ह कहिन के भुगतान होय हे, जिहां नइ होय हे, उहां भुगतान करे जात हे। कांग्रेस विधायक चिंतामणी घलो मक्का खरीदी म सवाल उठाइस। उमन कहिन के लुंड्रा विधानसभा म खरीदी नइ होवत हे। खाद्य मंत्री पुन्नू लाल मोहले ह जवाब म कहिन के आगू दफा किसान मन के पंजीयन कराके मक्का के खरीदी करे जाही।
