अब जाके जागिस नगरपालिका ह…आवारा मवेसी ल कांजी हाउस लेगत हे

नवनीत शुक्ला, मुंगेली। नींद ले जागिस नगरपालिका अब आवारा मवेसी ल अपन गाड़ी म भर के कांजी हाउस लेगत हे । कुछ दिन पहिली जय जोहार के खबर ले पालिका के नींद टूटिस ।
अउ आज संझा पालिका के गाड़ी आवारा मवेशी ल भर के काजी हाउस भेजिस । आय दिन चउक चउराहा अउ बीच रदद्दा म जानवर मन के बइठे के कारन दुरघटना होय के खतरा बढ़त रहिस । रोज दाऊपारा , पड़ाव चउक अउ बलानी चउक के रद्दा म ये जानवर झुंड म रहय । जेखर कारन ट्रइफिक बेवस्था ह बाधित होत रहिस । अंधियार होत ही ये मवेसी मन सड़क किनारे झुण्ड बना के बइठ जाथे । जेखर कारन साइकल चलइया, मोटर सायकिल वाले मन ल भारी समस्या के सामना कर बर पड़थे। आज जब लोरमी, कवर्धा, बिलासपुर, रायपुर हर तरफ के रोड़ मन सुघ्घर बन गे हे तेखर कारण हाईवा, कार, बस, ट्रक, आदि मन तेज गति ले गाडी चलाथे । अउ आये दिन ये बेजुबान मवेशी मन ओखर रफ्तार के कहर म शिकार होथे । आज हर गली, चउक- चउराहा, मेन रोड़ म आवारा मवेशी मन के कहर देखे बर मिलथे पर ये सब मामला म न तो नगर पालिका द्वारा अउ न ही पंचायत द्वारा कोई पहल देखे बर मिलत रहिस ।
अब जब पालिका के नींद खुलीस हे । तव नगर के तीर तिखार के गांव म तक पंचायत ल घलोक अब जागना चाही ।
काजी हाउस तक ल अब व्यवस्थित करे के जरूरत हे । काबर की कांजी हाउस के बारे म कुछ न कहे जाये वही अच्छा हे । वहां के व्यवस्था ह तव भगवान भरोसा हे। एक कोति जिहाँ सरकार अउ दूसर समाज सेवा संस्था द्वारा गौ रक्षा बर मुहीम चलाये जाथे । अउ इन बेजुबान जानवर मन बर सब चुप हो जाथे । लगत हे बिभाग द्वारा कुछु बड़े दुर्घटना के इंतिजार हे कि कब दुर्घटना होही अउ हम काम करबो ।अब तव एहु मामला म हमर जिला के मुखिया ल धयान देहे बर लगही । जब ले मुखिया ह पदभार ग्रहण करे हे जिला के विभाग मन म सकरात्मक सन्देश जावत हे । अब मुखिया के नजर म आये ले ये बेजुबान जानवर मन ल तक न्याय मिल सकही ।