जय जोहार रायपुर… चार दिन पहिली गायत्री नगर के स्टील सिटी के रहवासी मन पुलिस ल फोन करके जानकारी दिस कि इन्हा एक घर म लॉकडाउन के बाद भी भीड़ जमा हे अऊ हल्ला गुल्ला करे जात हे , पुलिस के पेट्रोलिंग गाडी घर पहुंचिस अऊ दरवाजा खुलवाय बर किहिस त उन्हा रहैय्या युवती अऊ ओखर दोस्त मन जन्मदिन के पार्टी मनाय के बात कहिके पुलिस टीम ले हुज्जत करे ल लग गे , पुलिस ओमन ल धर के खम्हारडीह थाना ले के आइस अऊ ऊंखर उपर धारा १५१ के तहत कार्यवाही करिस ,
इही बीच म एक न्यूज़ पोर्टल म खबर आगे कि स्टील सिटी ले युवक युवती मन आपत्तिजनक स्थिति म गिरफ्तार करे गे हे जबकि ऊंखर उपर १५१ के धारा लगाय गे रिहिस , अपन छबि खराब होय के आरोप लगात हुए युवती मन हपन घर म आज पत्रकार वार्ता करीन अऊ किहिन कि हमन जन्मदिन के पार्टी करत रेहेंन जो कि लॉकडाउन म हमर ले गलती होगे ,लेकिन न्यूज़ पोर्टल म कुछ भी उलुल झुलुल छाप दे गे हे एखर ले हमर छबी खराब होवत हे , बता दन कि उक्त युवती एक प्रतिष्ठित बैंक म सहायक मेनेजर हे ,
पूरा मामला म खम्हारडीह थाना के प्रभारी ममता अली शर्मा के कहना हे की पुलिस ल कालोनी के रहवासी मन फोन करके सूचना दिस कि उक्त घर में हल्ला गुल्ला होवत हे , जब पड़ताल बर पुलिस गिस त ओमन सहयोग करे के बजाय हुज्जत करे ल लग गे अइसे में ऊंखर उपर १५१ के कार्यवाही करे गिस अऊ उन्हा ले कोई भी आपत्तिजनक सामान नई मिले के पुष्टि घलो थाना प्रभारी ह करे हे.
