बेमेतरा। जिला म पानी के समस्या ले जूझत लोगन मन ल अब राहत मिले हे। जिला म सूखा ल देखत हुए प्रसासन ह 13 रेत खदान ल निरस्त कर दे रिहिस। जेकर फइसला कारगार साबित होत हे, अऊ सूखा के बाद घलो सिवनाथ नदिया म 94 किलोमीटर तक पानी भरे हे। जेकर ले जल आवर्धन योजना के तहत जिला के 152 गांव के प्यास बुझही।
अब ओमन अपन जिंदगी बढ़िया ढ़ंग ले गुजारत हे
कोंडागांव म एक महिला अऊ ओकर बेटा ल सरकारी योजना के अइसन लाभ मिलिस, कि अब ओमन अपन जिंदगी बढ़िया ढ़ंग ले गुजारत हे। असल म बड़ेकनेरा इलाका म भीख मांगके अपन जीवनयापन करइया सियान महिला के पीएम आवास योजना के तहत घर बनावाए गिस हे। जेमा अब सियान महिला ह अपन बेटा के संग रहत हे।
इमरजेंसी सेवा के कर्मचारी मन एक दरि फेर बेमियादी हड़ताल म चल दिन
कोरबा म 108,102 इमरजेंसी सेवा के कर्मचारी मन एक दरि फेर बेमियादी हड़ताल म चल दिन हे। आप मन ल बता दन कि संजीवनी अऊ महतारी एक्सप्रेस आपातकालीन एम्बुलेंस सेवा के स्टाफ लंबा बेरा ले विसंगती म सुधार करके न्यूनतम मजदूरी दे के मांग करे हे। फेर सासन, प्रसासन ह ओमन के मांग ल गंभीरता ले नइ ले गिस। जेकर खिलाफ कर्मचारी मन हरताल कर दिन। उहें जिला प्रसासन अऊ स्वास्थ्य बिभाग ह इमरजेंसी सेवा उपर हरताल के असर झन पड़य, एकर बर ड्राइवर अऊ ईएमटी स्टाफ के बेवस्था कर के एंबुलेंस के संचालन के बेवस्था करे के कोसिस करत हे।
