नई दिल्ली/रायपुर/जगदलपुर। छत्तीसगढ़ समेत देस के 6 राज्य म बुधवार अउ गुरुवार के भारी बरसा के चेतावनी जारी किए गे हे। मौसम विभाग के चेतावनी के बाद एनडीआरएफ के टीम रेड अलर्ट म हे।
छत्तीसगढ़, मध्य प्रदेश, महाराष्ट्र, गुजरात, तेलंगाना अउ नगालैंड म अवइया 48 घंटा म भारी बरसा के चेतावनी दे गे हे।
छत्तीसगढ़ म मंगलवार के घलो दिनभर बरसा होईस। जगदलपुर म गणपति रिसॉर्ट म फंसे 49 अउ बकावंड के बेलगांव म पंप हाउस म फंसे 6 लोगन ला रेस्क्यू टीम हा बाहिर निकालिस।
नगरसेना अउ एसडीआरएफ के टीम हा करीब 3 घंटा के रेस्क्यू ऑपरेशन के बाद दूनों जगा पानी म फंसे लोगन मन ला निकालके राहत सिविर म भेजिस। आज बुधवार के घलो सबो कोती जोरदार बरसा के संभावना हे।
जगदलपुर के महादेव घाट म इंद्रावती नदी के बाढ़ देखे बर अपन मां के संग आए कुम्हारपारा के रहइया युवती वैशाली हा अचानक पांव फिसले ले नदिया म गिर गे अउ बोहाए लगिस।
बोहावत-बोहावत खुद ला बचाए खातिर बर पेड़ के लाहा ला कसके धर लिस। ओला फंसे देखके दू झन युवक युवक आशीष मिश्रा अउ उमेश हा अपन जान के बाजी लगाके नदिया म छलांग लगा दिन अउ आलो सुरक्षित बाहिर निकालिन।
धमतरी के गंगरेल बांध हा ए साल अभी तक 25 फीसदी ही भराए हे। हालांकि अब बांध के भरे के उम्मीद बढ़ गे हे। बांध के कैचमेंट एरिया म बीते 24 घंटा म जोरदार बारिश होवत हे। ए कारण पानी भरपूर आवत हे।
हर घंटा बांध म जल स्तर 1 सेमी बाढ़त हे। मुरुमसिल्ली, दुधावा अउ सोंढूर बांध म घलो पानी के आवक धीरे-धीरे होवत हे।
No Comment! Be the first one.