पत्नी अऊ साली निकलिस सहायक आरक्षक के कातिल, वारदात ल छुपाए बर गढ़े रहिस मनगढ़ंत कहानी

जय जोहार धमतरी…. जिला के नगरी थाना के ग्राम डोंगरडुला म सहायक आरक्षक के हत्या के गुत्थी ल पुलिस सुलझा लिस। हत्या के आरोपी कोनो अऊ नई बल्कि सहायक आरक्षक के पत्नी अऊ ओखर साली निकलिस, जेन मन ह रस्सी ले गला घोटकर वारदात ल अंजाम दे रहिस।

पुलिस के मुताबिक पांच फरवरी के ओखर पत्नी लक्ष्मी बाई ह नगरी थाना म सूचना दिस कि मनोहर मरकाम चार फरवरी के रात 9 बजे शराब के नशा म लड़खड़ात बेहोश होके गिर गे रहिस। जेला इलाज बर नगरी अस्पताल गे रहिन, जिहा डॉक्टर मन वो ला मृत घोषित कर दिस। पत्नी के ये बयान ल देखत हुए मनोहर के मौत ह सामान्य नजर आत रहिस, लेकिन पोस्टमार्टम रिपोर्ट ह मामला के रूख ल हत्या के ओर मोड़ दिस। पुलिस ह ये मामला म हत्या के अपराध दर्ज कर जांच म जुट गिस। गांव म पूछताछ म ये बात सामने आइस कि मनोहर के कोनो ले न लड़ाई-झगड़ा रहिस न कोनो दुश्मनी रहिस। फिर शक के सुई घर म मौजूद मनोहर की पत्नी लक्ष्मी बाई मरकाम अऊ साली दामिनी नेताम म जाके टिक गिस। पुलिस ह दोनों ले अलग-अलग बिंदु मन म पूछताछ करिस। ये दौरान दोनों ह मनगढ़ंत कहानी मन ल बनात रहिस, लेकिन पुलिस ल चकमा नई दे पाइस अऊ अपन बात मन म फंस गिस। आखिरकार दोनों ह अपन अपराध ल कबूल कर लिस।