congress : मोदी सरकार के नवा अध्यादेश ले किसान पूंजीपति नई बलकी पूंजीपति मन के बनही गुलाम – धनंजय

जय जोहार…. मोदी सरकार के किसान विरोधी अध्यादेश के खिलाफ किसान संगठन मन के भारत बन्द ल कांग्रेस (congress) ह समर्थन करे हे।

प्रदेश कांग्रेस प्रवक्ता धनंजय सिंह ठाकुर ह कहिन कि मोदी सरकार के तरफ ले लाय गे तीन नवा अध्यादेश म किसान मन ल पूंजीपति बनाय के योजना ह नई दिखत हे, बलकी किसान मन ल चंद पूंजीपति मन के हाथ के कठपुतली, गुलाम बनाय के स्पस्ट तैयारी ह नजर आवत हे।

प्रदेश कांग्रेस (congress) प्रवक्ता धनंजय सिंह ठाकुर ह कहिन कि बीते छह साल ले मोदी सरकार ह छत्तीसगढ़ ही नई देश भर के किसान मन के संग छल, फरेब अऊ धोखा करत हे। स्वामीनाथन कमेटी के सिफारिश के अनुसार लागत मूल्य के डेढ गुना समर्थन मूल्य दे के वादा कर सत्ता म बइठे मोदी सरकार ह 6 साल म किसान मन ले करे गे वादा ल पूरा नई करिन।

सस्ता डीजल-रासायनिक खाद अऊ उत्तम क्वालिटी के बीज सहित किसान मन के आय ल दुगुनी करे के वादा अब तक पूरा नई होईस। किसान सम्मान निधि के नाम ले घलो किसान मन के अपमान करे गिस। प्रदेश कांग्रेस (congress) प्रवक्ता धनंजय सिंह ठाकुर ह कहिन कि मोदी सरकार के तरफ ले लाय गे तीन काला कानून ह किसान मन बर काला पानी के सजा के तरह फरमान हे। जेमा किसान त सिरिफ फसल उगाही अऊ फायदा पूंजीपति ल मिलही।