नवनीत शुक्ला, मुंगेली । शराबी मन ह शराब पी के गाडी चलई म के पुलिस अउ यातायात विभाग के पकड़ ह कमजोर पड़त जात हे । हर एक दु दिन म कहि न कही वाहन दुर्घटना के खबर सुने बर मिलत हे,,कुछ दिन पहिली सिटी कोटवाली के नवा आये टी आई आशीष अरोरा ह वाहन चेकिंग के अभियान चलाए रहिस। जेमा लाइसेंस, कागजात के जाँच करेगिस अउ शराबी मन ला शराब पीके गाड़ी चलाए ल लेके ऊंखर ऊपर कार्यवाही करे गे रहिस। वाहन दुर्घटना के केस म ज्यादा तर शराब पी के गाड़ी चलवाई मन के संख्या ज्यादा होथे । हमर जिला म शराब पी के गाड़ी चलविया मन के चेकिंग करे बर जेन मशीन के प्रयोग करे जाथे । तेन हवय जरूर,,पर न तो ओखर उपयोग करत देखे जा थे अउ न होवय। वो मशीन ह ज्यादातर खराब मिलथे। नगर अउ आस पास के गांव म अवैध शराब के ठिहा होय के कारन आज कल लइका मन घलौक शराब के सेवन करे लगिस हे । जेखर चलते सड़क दुर्घटना के संख्या म तक बढ़ोतरी होत हे । शाम के समय रायपुर रोड़, नवागढ़ रोड़, घुठेरा नवागांव रोड़ कति सुनसान जगह म ये शराबी मन शराब पियत मिल जाथे।अउ तेज रफ्तार म वाहन चलात नगर म प्रवेश करथे। चौक चौराहों मन म ट्रैफिक पुलिस तो तैनात दिखथे पर ये शराबी मन ल अब ओकरो डर खत्म हो गे अइसन लागत हे ।
