कोरोना पॉजिटिव एक अऊ मरीज होगे स्वस्थ, एम्स ह करिस डिस्चार्ज, स्वास्थ्य मंत्री ह दिस जानकारी

जय जोहार रायपुर…. छत्तीसगढ़ म कोरोना पॉजिटिव एक अऊ मरीज ह पूरा तरह ले ठीक हो गे हे। ओला रायपुर एम्स ले डिस्चार्ज घलो कर दे गे हे। प्रदेश के स्वास्थ्य मंत्री टीएस सिंहदेव ह खुद ए बात के पुष्टि करे हे।

दरअसल, छत्तीसगढ़ म उही वक्त खलबली मच गे रहिस, जब मरकज ले जुड़े एक जमाती ल कोरोना पॉजिटिव पाए गे रहिस। नागपुर के रहवइया 16 साल के लड़का ह जमात म शामिल होके छत्तीसगढ़ के कोरबा जिला के कटघोरा म रहत रहिस, इहां ओला क्वारेंटाइन कर रखे के दावा घलो करे गे रहिस। मगर जांच रिपोर्ट ह पॉजिटिव आए के बाद शासन-प्रशासन म खलबली मच गे रहिस। पूरा कटघोरा इलाका ल सील कर युवक ले संपर्क म आए वाला सबो के पहचान कर सैंपल ले गिस। शुक्रवार रात युवक ह पूरा तरह ले स्वस्थ होके रायपुर एम्स ले डिस्चार्ज हो गिस। जेखर बाद शासन-प्रशासन ले लेके एम्स प्रबंधन ह घलो कुछु राहत के सांस ले हे।