40 मिनट म बांग्लादेसी विमान ह दूसर दिसा म होगे सिफ्ट

रायपुर। रायपुर के स्वामी विवेकानंद एयरपोरट म करीबन तीन बछर ले खड़े बांग्लादेसी विमान ल दूसर दिसा म शिफ्ट करे गिस हे। यूनाइटेड बांग्लादेस के विमान के स्थान म परिवरतन करे गिस हे ये ला अब रनवे के पस्चिम दिसा में रखे गिस हे, जिहां ले विमान मन के प्रचालन म कोनो व्यवधान नइ होवय। आप मन ल बतादन के ढाका ले मस्कट जात बेरा म बांग्लादेसी विमान के रायपुर एयरपोरट म 7 अगस्त 2015 के आपात लैंडिंग कराय गिस। तब ले ये विमान ह रायपुर एयरपोरट म ही खड़े हवय। विमानन कंपनी उपर एयरपोरट के लगभग साठ लाख रूपिया बकाया हे।
यूनाइटेड बांग्लादेस के प्रतिनिधि इनायत हुसैन, सहायक प्रबंधक (इंजीनियरिंग) अउ सुभंकर बनर्जी, सहायक महाप्रबंधक, कोलकाता के उपस्थिति म एयर इंडिया के सहयोग ले विमान सिफ्टिंग के कारय पूरा करे गिस । विमान ल दूसर जगह सिफ्ट करे म 40 मिनट लगिस हे। दुपहर 1:50 बजे ले सुरू होय सिफ्टिंग 2:30 दुपहर के समाप्त होइस।
यूनाइटेड बांग्लादेस द्वारा खाली करेगे स्थान म आवइया चुनाई म छोटे-छोटे विमान मन ल रखे म सहुलियत होही। येखर बाद म इही स्थान म समानांतर टैक्सी ट्रैक बनाय के घलो योजना हे। ये कारय म पूरन सहयोग देय बर राकेश सहाय विमानपत्तन निदेसक ह विशेस कर एयर इंडिया ल धन्यवाद दिस। ये कारय के बाद भारतीय विमानत्तन प्राधिकरन बकाया रासि बर यूनाइटेड बांग्लादेस उपर दबाव बनाही अउ कंपनी ल अपन विमान ल जल्दी वापिस ले जाय बर कहही।