जय जोहार। (Raipur) मुख्यमंत्री भूपेश बघेल ह आज अपन निवास कार्यालय म आयोजित सम्मान समारोह कार्यक्रम म सुप्रसिद्ध साहित्यकार अउ पत्रकार लीलाधर मंडलोई ल वसुंधरा सम्मान ले सम्मानित करीन । ए अवसर म मुख्यमंत्री ह किहीन कि हरेक बछर साहित्य अउ पत्रकारिता के क्षेत्र म उल्लेखनीय काम करइया ल ए सम्मान ले सम्मानित करे जात हे । मंडलोई जी ह साहित्य अउ पत्रकारिता के क्षेत्र म उल्लेखनीय काम करे हे ।
(Raipur) उल्लेखनीय हे कि वसुंधरा सम्मान ल स्वर्गीय देवी प्रसाद चौबे के स्मृति म प्रदान करे जात हे । मुख्यमंत्री ह स्वर्गीय देवी प्रसाद चौबे ल याद करत किहीन कि स्वर्गीय देवी प्रसाद चौबे ह ग्रामीण पत्रकारिता के पुरोधा रिहीन । वोहा समाज सुधार के क्षेत्र म बड़ अकन कान करीन । स्वर्गीय देवी प्रसाद चौबे ह बलि प्रथा के घोर विरोधी रिहीन । वोहा अपन गांव के मंदिर म घलो बलि प्रथा ल बंद करा दे रिहीन ।
स्वर्गीय श्री देवी प्रसाद चौबे के 46वीं पुण्यतिथि म आयोजित वसुंधरा सम्मान के ये सरलग 22वां आयोजन हे । ए सम्मान के अंतर्गत श्री मंडलोई ल प्रसस्ति पत्र, स्मृति चिन्ह अउ सम्मान निधि प्रदान करे गीन ।कार्यक्रम म कृषि मंत्री रविन्द्र चौबे, संस्कृति मंत्री अमरजीत भगत, पद्मश्री भारती बन्धु, पद्मश्री मदन चौहान, वरिष्ठ साहित्यकार विष्णु नागर अउ दूसर गणमान्य नागरिक उपस्थित रिहीन ।
