दंतेवाड़ा। छत्तीसगढ़ म पहिली बार अइसे होही, जब सरेंडर कर चुके महिला नक्सली मन देश के आजादी के जश्न म 15 अगस्त के होवइया परेड के हिस्सा बनहीं अउ राष्ट्रध्वज ला सलामी देहीं।
दंतेवाड़ा म एकर बर रिहर्सल घलो हो गे हे। नक्सली मन ले आजाद होए के बाद पहिली बार देश के आजादी के जश्न अउ परेड म शामिल होय बर ये सरेंडर महिला नक्सली मन बहुत उत्साहित हें।
इहां ए दरी एक अउ खास बात ये होही कि पूरा परेड ला महिला डीएसपी दिनेश्वरी नन्द हा परेड कमांडर के रूप म अउ एएसआई अनिता मेश्राम हा परेड टूआईसी के रूप म लीड करहीं। उंकर कमांड म पूरा 14 दल कदम ले कदम मिलाहीं।
ए दरी के परेड म दंतेश्वरी फाइटर्स टीम ला घलो शामिल करे जावत हे। एकर अलावा अइसे भी पहिली बार होही, जब सीआरपीएफ बस्तरिया बटालियन के महिला कमांडो मन घलो ये परेड म शामिल होहीं।
एसपी डॉ अभिषेक पल्लव हा बताईन कि ए दरी स्वतंत्रता दिवस के परेड म दंतेश्वरी लड़ाके के टीम ला घलो शामिल करे गे हे। ए टीम म शामिल सरेंडर महिला नक्सली मन भी पहिली बार परेड करत राष्ट्रध्वज ला सलामी देहीं। प्रदेश म अइसे अब तक कहूं भी नई होए हे।
परेड म महिला सशक्तिकरण के झलक दिखही। सबो महिला प्लाटून के टीम आगे रहीं। उंकर कदम ताल म पुरुष मन के प्लाटून आगू बढ़ही। बताए जावत हे कि डीएसपी दिनेश्वरी के संग महिला एएसआई अनिता हा परेड ला लीड करहीं।
No Comment! Be the first one.