राजनंदगांव हाई-टेक बस स्टैंड सितंबर के आखरी म पूरा होही

रायपुर । मुख्यमंत्री डॉ रमन सिंह ह सहरी प्रसासन बेभाग के अधिकारी मन के एक समीक्षा बइठक के काली अध्यक्षता करिन। अधिकारी मन ह सहर अऊ कस्बा मन के विकास बर राज्य अऊ केंद्र सरकार के योजना मन के विस्तृत विस्लेसन प्रस्तुत करिन।
अधिकारी मन ह बताइन के केंद्र सरकार ह 2015-2016 ले 2019-2020 बछर के अवधि बर ‘अमृत मिशन’ के तहत 2193 करोड़ रुपिया के प्रस्ताव मन ल मंजूरी देहे हे। ए योजना म 9 सहर – रायपुर, बिलासपुर, दुर्ग, भिलाई, राजनंदगांव, अंबिकापुर, जगदलपुर, रायगढ़ अऊ कोरबा सामिल रहिस। 2020 तक सबो विकास काम मन ल पूरा करए के लक्ष्य हे। अधिकांस स्वीकृत रासि (78 प्रतिसत) जल वितरन परियोजना म खरच करे जात हे, जमो सीवरेज प्रबंधन म 20 प्रतिशत के राशि खरच होवत हे। कस्बा अऊ सहर मन बर करीबन 176 योजना मन ल मंजूर करे गए हे। ये सबो विकास काम मन ल 2020 तक पूरा करे जाही।
पेयजल के काम विकास के कई ठन चरन मन पूरा होना हे। स्वच्छ भारत मिशन के तहत 168 शहरी निकाय मन म 3.25 लाख शउचालय के लक्ष्य के पाछू 3.17 लाख निजी शउचालय मन के निरमान करे गे हे। छत्तीसगढ़ ह जनवरी-फरवरी 2018 म तीसरइया पइत सर्वश्रेष्ठ ‘स्वच्छता’ पुरस्कार जीते हे। जेमा अंबिकापुर ल सबले उप्‍पर स्थान मिले हे।
बइठक म बताय गीस के प्रधान मंत्री आवास परियोजना के तहत 3 लाख घर बनाय के लक्छय के पाछू 1.65 लाख घर बनाय गे हे। करीबन 46 हजार घर बनइया हे। राजनंदगांव म हाई-टेक बस स्टैंड सितंबर के आखरी तक पूरा हो जाही। समीक्छा बइठक के बेरा शहरी प्रसासन मंत्री अमर अग्रवाल, मुख्य सचिव अजय सिंह, मुख्यमंत्री के प्रधान सचिव अमन कुमार सिंह, शहरी प्रशासन विभाग सचिव डॉ रोहित यादव अऊ आन वरिष्ठ अधिकारी मन ह बैठक म हिस्सा लीन। येखर अलावा सहरी प्रशासन विभाग के निदेशक निरंजन दास अऊ कतको ठन बेभाग मन के वरिस्ठ अधिकारी घलोक उपस्थित रहिन।