रायपुर । मुख्यमंत्री डॉ. रमन सिंह ले आज इहां ऊंखर निवास कार्यालय म भारतीय पुलिस सेवा के साल 2017 बैच के परिवीक्षाधीन अधिकारी मन के प्रतिनिधि मण्डल ह सौजन्य मुलाकात करिन। ये पुलिस अधिकारी छत्तीसगढ़ के दू दिन के अध्ययन दौरा म आये हें। मुख्यमंत्री ह अधिकारी मन ल ऊंखर उज्जवल भविष्य बर शुभकामना दीन।
मुख्यमंत्री ह अधिकारी मन ल संबोधित करत कहिन कि कानून अऊ व्यवस्था के संगें-संग विकास कार्य मन म घलोक पुलिस के महत्वपूर्ण भूमिका होथे। विशेष रुप ले छत्तीसगढ़ जइसे नक्सल प्रभावित राज्य म दंतेवाड़ा, सुकमा, बीजापुर जइसन जिला मन के अंदरुनी इलाका मन म पुल-पुलिया, सड़क मन अऊ स्कूल भवन मन के निर्माण पुलिस अऊ सशस्त्र बल मन के सुरक्षा म करे जात हे। उमन युवा पुलिस अधिकारी मन ले कहिन कि जऊन चुनौती मिलय ओला स्वीकार करके धैर्य के संग आगू बढ़ना चाही सफलता जरूर मिलथे। काम के क्षेत्र म हर दिन आप मन के धैर्य के परीक्षा होही। डॉ. सिंह ह अधिकारी मन ल योग अऊ प्राणायाम करे के सुझाव घलोक देवत कहिन कि एखर से दिन भर काम करे के ऊर्जा बने रहिथे। ये पुलिस अधिकारी नया रायपुर अऊ बस्तर के दौरा म घलोक जाही। मुख्यमंत्री ह प्रदेश के विकास यात्रा म प्रकाश डालत कहिन कि पिछड़ा कहलइया छत्तीसगढ़ आज तेजी ले विकास करत हे। उमन नया रायपुर के बारे म जानकारी देवत कहिन कि नवा रायपुर 21वीं शताब्दी के पहिली स्मार्ट सिटी हे। ए अवसर म अकतहा पुलिस महानिदेशक, प्रशिक्षण अउ प्रशासन संजय पिल्ले, मुख्यमंत्री के प्रमुख सचिव अमन कुमार सिंह, विशेष सचिव रजत कुमार अऊ पुलिस महानिरीक्षक प्रशिक्षण एस.आर.पी. कल्लुरी घलोक उपस्थित रहिन।
