रायपुर । मुख्यमंत्री डॉ. रमन सिंह ले इहां ऊंखर निवास कार्यालय म छत्तीसगढ़ राज्य हज कमेटी के पदाधिकारी मन ह अध्यक्ष सैय्यद सैफुद्दीन के नेतृत्व म सौजन्य मुलाकात करिन। ए मौका म मुख्यमंत्री डॉ. सिंह ह राज्य हज कमेटी कोति ले प्रकाशित ‘वार्षिक प्रतिवेदन हज-2017’ पत्रिका के विमोचन घलोक करिन। डॉ. सिंह ले मुलाकात के समय हज कमेटी कोति ले प्रदेश म हज यात्रा 2018 बर तइयारी मन के जानकारी दे गीस। प्रतिनिधि मंडल ह आगामी जुलाई महिना म हज यात्रा बर आयोजित होवइया राज्य स्तरीय टीकाकरण अउ हज किट वितरण कार्यक्रम म ओ मन ल सामिल होए के न्यौता दीन। छत्तीसगढ़ म हज यात्रा 2018 बर अब तक 454 हज यात्री मन के चिन्हांकन करे गए हे। ये मां 241 पुरूष अऊ 213 महिला हज यात्री सामिल हे। प्रदेश ले हज यात्री 29 जुलाई ले 4 अगस्त के बीच नागपुर ले हज यात्रा बर रवाना होहीं। इकर स्वदेश वापसी 12 सितमबर ले 18 सितमबर तक होही। हज यात्री मन के सुविधा बर अभी हाल म प्रदेश के छह कई ठन जघा रायपुर, बिलासपुर, जगदलपुर (बस्तर), उत्तर बस्तर (कांकेर), अम्बिकापुर (सरगुजा) अऊ भिलाई (दुर्ग) म प्रशिक्षण कार्यक्रम चलाय जात हे। ए अवसर म छत्तीसगढ़ राज्य हज कमेटी के सदस्य मो. सलीम खान अउ पूर्व सदस्य मो. रिफअत अली उपस्थित रहिन।
