सोशल मीडिया म करे दोस्ती.. अऊ धकेल देत रिहिस जिस्मफरोसी के कारोबार म

जय जोहार. गरीब के गरीबी के फायदा उठाए के एक गंभीर मामला रायपुर के कबीर नगर म सामने आए हे। मामला म गरीब लड़की मन ल सोशल मीडिया के जरिए अपन प्यार के जाल में फंसा के ओखर ले देह व्यापार कराए के मामला सामने आए हे। ऐ व्यापार ल आरोपी युवक के मां ह अंजाम देत रिहिस।

राजधानी के कबीर नगर इलाका म इतवार के देर रात पुलिस के रेड पड़िस। जिहां मौका ले नाबालिग समेत तीन लड़की सहित आरोपी महिला दलाल अऊ ओखर बेटा ल पकड़े गिस। बताए जात हे कि महिला दलाल के बेटा ह पहिली गरीब लड़की मन ल प्रेम जाल म फंसाके घर लाए अऊ ओखर मां ह जबरदस्ती लड़की मन ल ग्राहक जगह भेजे।

कबीर नगर थाना इलाके के हाउसिंग बोर्ड कॉलोनी म महिला दलाल आशा वर्मा अऊ ओखर बेटा मुकेश वर्मा ह मिलके ऐ कारोबार ल संचालित करत रिहिस। मुकेश ह सोशल मीडिया म गरीब अऊ साधारण परिवार की लड़की मन ले दोस्ती कर के ओमल ल अपन प्रेम जाल म फंसाए। जब लड़की मन जाल म फंसके घर आए तो ओखर मां ग्राहक ल ऑफर करे।

ऐ पूरा मामला के भनक जब आस पड़ोस म रहवईया मन ल लगिस तब मुकेश के संदिग्ध गतिविधि के बारे म पुलिस ल सूचित करे गिस। पुलिस ह जांच में पाईस कि हाउसिंग बोर्ड कॉलोनी के ओ मकान म गलत काम होवत हे। फेर पुलिस ह देर रात उहां छापा मारके ऐ पूरा मामला ल उजागर करे हे। मौका ले पकड़े गे तीन लड़की में से एक झन नाबालिग हे जेन मन ह राजनांदगांव अऊ दुर्ग के रहवईया ए।